Tavolina — pikët e mbrëmjes

Numërues pikësh për lojërat e një tavoline. Zëvendëson fletën e Google Sheets-it: shënon pikët e secilit raund dhe nxjerr vetë totalet, renditjen dhe shlyerjen.

Katër lojëra, një grup, një bazë:

Loja	Raundi	Mbaron	Fiton
Bridzh — xhin-rami kosovar me 14 letra, hapja me 51 pikë	pikët e secilit, ose llogaritësi hant/normal	pas dy raundeve për lojtar	totali më i vogël
Magarec — loja e shkronjave	një prekje: kush e humbi	kur dikujt i mbushet fjala „MAGAREC"	më pak shkronja
Domina — gurët e mbetur në dorë	pikët e secilit	kur dikujt i mbushet kufiri	totali më i vogël
Pishpirik — 25 pikë për dorë, plus 10 për çdo pishpirik	pikët e dorës	kur dikush arrin kufirin	totali më i madh

Pishpiriku është i vetmi që fitohet nga ana tjetër, dhe ekrani e thotë atë me fjalë: renditja, kurora dhe fjalia e fundit e lexojnë drejtimin nga vetë loja.

Çka bën

• Grupe dhe lojtarë — shoqëria futet një herë, e tërë me një shkrim («alfa, beta, gama, delta»), dhe radha e emrave ruhet.

• Zgjedhje para lojës — grupi mund të ketë gjashtë të rregullt dhe sonte të luajnë katër.

• Shtim mes lojës — kush ulet te tavolina në raundin e pestë shtohet aty për aty, nga grupi ose si emër krejt i ri; raundet e shkuara nuk i preken dhe totali i tij nis nga hera e parë që shënon.

• Futje e raundit — një numër për lojtar, ose përmes llogaritësit hant/normal, i cili e ruan raundin vetë me një prekje. Kush mbylli zgjidhet duke prekur emrin, jo nga një listë e shpalosur.

• Mbledhësja e dorës — çdo fushë pikësh ka një kuti me tastierë të vetën që i mbledh letrat ose gurët një nga një («10 + 15 + 5»), sepse tastiera numerike e telefonit nuk ka «+». Termat rrinë të dukshëm derisa të shtypet «Gati».

• Data ditë/muaj/vit — shkruhet me numra dhe vijat dalin vetë; poshtë saj rri data me fjalë, që të mos ngatërrohet ditë me muaj.

• Rregullat brenda aplikacionit — çdo lojë i ka të vetat te një panel i mbledhur, te ekrani ku zgjidhet çka luhet dhe te ai i lojës: si shënohet raundi, sa vlen çka, dhe me çka mbaron mbrëmja. Deri ku luhet nuk shkruhet atje — atë e zgjedh tavolina për çdo mbrëmje.

• Çka luhet — zgjidhet para lojës, dhe çelësi nis te loja e fundit e grupit. Te magareci raundi ka një pyetje të vetme: kush e humbi. Prekja e emrit e ruan raundin, shkronja shkon te ai, e rrjeti M-A-G-A-R-E-C tregon ku janë të gjithë.

• Domina dhe pishpirik — i njëjti rrjet fushash si te bridzhi, pa llogaritës: numri numërohet te tavolina, ku janë gurët e letrat. Mbrëmja mbaron kur dikush e arrin kufirin që u zgjodh kur nisi — ose kurrë, nëse u nis «pa kufi» — dhe fjalia e fundit e thotë se kush e arriti.

• Renditja — sipas totalit, në drejtimin që e fiton loja: i pari është ai me më pak pikë kudo veç pishpirikut. Kur nuk kanë luajtur të gjithë njësoj, shtohet kolona „raunde" dhe një shënim. Barazimi te kreu nuk fshihet: kurora u shkon të gjithëve që e ndajnë totalin më të vogël.

• Dy raunde për lojtar — aq zgjat një lojë bridzhi, pra tavolina rrotullohet dy herë. Kreu tregon «4 nga 8 raunde», dhe kur mbushen futja mbyllet me fituesin, si te magareci kur mbushet fjala. Raundi i shënuar gabim rregullohet nga lista, dhe kush u ul vonë shtohet te lojtarët — mbrëmja zgjatet vetvetiu.

• Kush përzien — radha e emrave është radha e tavolinës, prandaj krah titullit të raundit rri kush i përzien letrat; kalon një vend çdo raund.

• Sa zgjat mbrëmja — kreu tregon orën kur u hap fleta dhe sa kohë ka që luhet («nisi 20:45 · 2 orë e 15 min»); sapo mbrëmja mbaron, numri ngrin te sa zgjati vërtet («20:45–23:55 · 3 orë e 10 min») dhe historiku i grupit e mban atë gjatësi. Fundi është raundi i fundit i shënuar e jo çasti kur u shtyp «Mbyll» — fleta mbyllet ndonjëherë gjysmë ore më vonë, dhe ajo gjysmë orë nuk u luajt. Kur ora nuk dihet — një fletë e kthyer nga një kopje e vjetër, ose një mbrëmje e rihapur pas një jave — nuk shkruhet numër fare.

• Parashikimi — kush e arrin dot ende vendin e parë me raundet që kanë mbetur, dhe brenda sa raundeve. Tabela jep vendin më të mirë e më të keq që mund të arrijë secili, për raundin tjetër ose deri në fund. Numrat vijnë nga vetë rregulli: një raund mbyll 240 pikë diferencë te bridzhi, dhe një shkronjë te magareci. Te domina e pishpiriku blloku nuk del fare: sa bën një dorë atje nuk e thotë rregulli, dhe një parashikim pa kufij do të ishte numër i shpikur.

• Shlyerja — matrica N×N e diferencave, matrica[i][j] = total[i] − total[j], me lojtarët sipas renditjes. Del te bridzhi e te domina; te magareci e te pishpiriku jo, sepse atje diferenca nuk paguhet me para.

• Historik sipas ditës — një grup ka shumë lojëra, edhe dy të njëjtën ditë, secila me renditjen e vet përfundimtare aty për aty.

• Të përgjithshmet — një tabelë për secilën lojë që grupi ka luajtur: lojëra, fitore dhe totali mesatar, e llogaritur nga vetë raundet. Tabelat rrinë të ndara sepse numrat nuk janë të njëjtë lloj — pikë bridzhi, pikë domine, shkronja, pikë pishpiriku.

• Redaktim dhe fshirje — çdo raund ndryshohet pas ruajtjes; gjithçka rillogaritet vetvetiu.

• Pikët drejtpërdrejt — kush rri rreth tavolinës i shikon pikët në telefonin e vet, dhe raundi i ri del vetë. Lidhja bëhet drejt mes telefonave me një kanal WebRTC, në dy mënyra:

  • Pa server — sinjalizimi kalon nëpër dy kode QR dhe kamerën e telefonit, prandaj server nuk duhet as për t'u lidhur. Kërkon që telefonat të rrinë te e njëjta rrjetë.
  • Me kod (parazgjedhja) — një kod i vetëm tetëkarakterësh, që diktohet me zë ose skanohet një herë. Punon edhe nëpër rrjeta të ndryshme, sepse shoqëria rrallë rri te i njëjti wifi — por i duhet internet dhe një server i huaj për t'i lidhur pajisjet. Lidhja kërkon butonin, dhe ekrani e thotë çka del nga pajisja. Serveri që bie nuk e mbaron mbrëmjen: lidhja provohet sërish vetvetiu, kodi i shkruar në letër mbetet i njëjti, dhe ana që shikon rilidhet pa e prekur kush.
  • Takim — i njëjti kod i vetëm, por serveri që i lidh dy telefonat është i vetë aplikacionit, dhe preket vetëm sa zgjat lidhja. Kërkon të njëjtin wifi, si mënyra pa server — ajo që ndërron është numri i skanimeve, nga dy në një. Nëpër të kalojnë vetëm kredencialet e lidhjes, kurrë pikët.

• Ose një fotografi e çastit — rezultati shkon brenda vetë adresës dhe adresa bëhet kod QR. Punon edhe atje ku rrjeta i ndan pajisjet nga njëra-tjetra, dhe edhe nëpër mesazh.

  Të dyja hapen edhe në një telefon që nuk e ka aplikacionin, dhe asnjëra nuk lexon as shkruan në bazën e tij. Pamja që hapet nis me përmbledhjen — kush prin, sa vjen i dyti prapa, sa raunde kanë mbetur dhe kush përzien — dhe ka «Unë jam …»: prek emrin tënd, dhe del rreshti yt i matricës, kujt sa i del.

• Mbrëmja e luajtur te telefoni — bridzhi tani luhet edhe drejtpërdrejt mes telefonave, me bridzh-online, dhe kur mbaron atje nxirret si skedar. Paneli «Sill një mbrëmje» te ekrani i grupit e hap atë skedar dhe i shton raundet e tij te ai grup. Shton, nuk zëvendëson — ndryshe nga kopja rezervë, e cila e kthen tërë bazën. Ndarja mbetet ajo që ishte: atje ndahen letrat, këtu numërohen pikët.

• Kopje rezervë — nxjerrja dhe kthimi i tërë historikut si një skedar JSON.

• Sinkronizim mes pajisjeve, i zgjedhur — nëse i do të njëjtat mbrëmje te telefoni dhe te tableti, lidh projektin tënd Supabase: adresën dhe çelësin i shkruan vetë, baza është e jotja, llogaria ekziston vetëm brenda saj, dhe Tavolina nuk ka server të vetin as atëherë. Asnjë projekt nuk vjen i gatshëm me aplikacionin — pa ato dy fusha nuk niset asnjë kërkesë. Rri e fikur derisa ta lidhësh me dorë; pajisja e sapolidhur vetëm lexon derisa t'i thuash cila anë është e vërteta.

• Punon pa internet, dhe instalohet — një punëtor shërbimi i ruan skedarët e faqes me hapjen e parë, prandaj aplikacioni hapet i plotë edhe në «mënyrë avioni», dhe shtohet te ekrani kryesor i telefonit si aplikacion më vete. Kur del një version i ri, ai pret: fundfaqja e thotë, dhe kalimi bëhet me një prekje — kurrë nën këmbët e një loje që po shënohet.

Punon pa internet. Të dhënat rrinë në shfletuesin e pajisjes — dhe, vetëm nëse e lidh vetë, edhe te projekti yt Supabase.

Çka del nga pajisja

Pikët, emrat dhe raundet rrinë te telefoni, dhe dalin vetëm kur i nxjerr vetë përdoruesi — një kopje rezervë, një kod QR, një lidhje e drejtpërdrejtë.

Tri gjëra të tjera prekin një server, dhe të tria thuhen te ekrani aty ku përdoren:

• Lidhja «me kod» — te serveri i sinjalizimit shkojnë kodi dhe adresat e rrjetës, kurrë pikët. Kërkon butonin; pa të nuk niset asgjë.
• Numërimi i hapjeve (Vercel Web Analytics) — nga faqja del emri i rrugës, /loja/[id] ose /shiko, e asgjë tjetër. Adresa e vërtetë nuk del kurrë: brenda saj rri mbrëmja e ndarë, prandaj pastrohet para se të nisë. Pa cookie dhe pa asgjë të mbajtur mend për vizitorin.
• Sinkronizimi — grupet, lojërat dhe raundet, pra emrat dhe pikët, shkruhen te një bazë Supabase. Ajo bazë nuk është e jona: e krijon dhe e zotëron vetë përdoruesi, hyn me një llogari që ekziston vetëm brenda saj, dhe rregulli row level security i skriptit bën që rreshtat e një llogarie t'i shohë vetëm ajo. Kërkon ta lidhësh me dorë; pa këtë, asnjë kërkesë nuk del.

Për ta pasur atë numërim, «Web Analytics» ndizet një herë te paneli i projektit te Vercel; skripti vjen nga vetë domeni (/_vercel/insights/…), prandaj asnjë host i huaj nuk kërkohet me hapjen e faqes.

Një projekt Supabase mban edhe aplikacionet e tjera

Nuk të duhet një projekt për çdo aplikacion. Tavolina i shkruan mbrëmjet vetëm te tavolina_records, dhe politika, trigger-i e indeksi e mbajnë emrin e asaj tabele — pra nuk përplasen dot me tabelën e një aplikacioni tjetër te e njëjta bazë. Skripti i konfigurimit e krijon atë tabelë e nuk prek asgjë tjetër që gjendet aty, dhe ekzekutimi i dytë nuk ndryshon gjë.

Pra një projekt i vetëm mban njëkohësisht Tavolinën (tavolina_records), FinanCarePersonal (financare_records) dhe GuestSeat (guestseat_records). Rreshtat i ndan kolona user_id dhe i njëjti rregull row level security, prandaj një llogari e vetme — i njëjti email e fjalëkalim — hyn te të tria: te i pari shtypet «Krijo llogari», te dy të tjerët «Hyr».

Dy gjëra duhen ditur:

• Site URL është e përbashkët, dhe i takon atij aplikacioni që e zuri i pari. Mos ia prek: të tre e kërkojnë adresën e vet me emër te regjistrimi (redirect_to), prandaj mjafton ta shtosh atë adresë te Redirect URLs.
• Skripti i secilit ekzekutohet një herë, nga vetë aplikacioni — «Konfiguro projektin» te ekrani i tij. Secili krijon vetëm tabelën e vet.

Cili rresht i kujt është e thotë vetë emri i tabelës, prandaj asnjë nga të tre nuk mban një kolonë që e përsërit — do të ishte vlerë e derivuar e ruajtur (pika 2). Kur ajo kolonë duhet vërtet, për ta lexuar bazën si një e tërë, skripti sql/tri-aplikacionet.sql te FinanCarePersonal e nxjerr kur lexohet: dy pamje mbi tri tabelat, njëra me kolonën app dhe tjetra me kohën kur secili aplikacion e preku projektin së fundi. Ekzekutohet një herë te SQL Editor-i dhe nuk prek asnjë rresht.

Anash kësaj ka edhe një përfitim që nuk ka të bëjë me kodin: plani falas i Supabase-it e ndal një projekt që rri disa ditë pa u prekur. Një projekt që e përdorin disa aplikacione nuk rri pa u prekur — prandaj mbrëmjet e një shoqërie që luan një herë në muaj rrinë gjallë mbi shpinën e një libri llogarish që hapet çdo ditë.

Rregullat e pikëzimit

Hapja lejohet me 51 pikë kombinimesh prej një dore me 14 letra. Raundin e mbyll ai që i ka hedhur të gjitha letrat dhe e mbaron me letrën e fundit, pa i mbetur asnjë në dorë. Dy mbyllje:

	Mbyllësi	Të tjerët që s’hapën	Të tjerët që kishin hapur
Hant — mbylli pa hedhur e pa shitur asnjë letër	−40	+200	2 × pikët në dorë
Normal — kishte hapur më parë	−20	+100	pikët në dorë

„I hapur" është lojtari që ka hedhur së paku një letër ose i ka shitur një letër dikujt atë raund.

Llogaritësi i zbaton këto rregulla dhe e ruan raundin ashtu si i llogarit — një prekje për raundin që bie brenda tyre. Fushat e numrave mbeten gjithmonë të redaktueshme, dhe «Vendosi te fushat» i shkruan pikët aty pa i ruajtur: te fletët e vjetra ka raunde që nuk dalin nga rregullat, dhe një aplikacion që pranon vetëm kombinimet e lejuara nuk do t’i shënonte dot.

Rregullat e dominës dhe të pishpirikut

Asnjëra nuk ka llogaritës: numri vjen i numëruar nga tavolina.

	Raundi	Deri te	Fiton
Domina	sa gurë i mbetën secilit në dorë	100 a 250 pikë	totali më i vogël
Pishpirik	pikët e dorës — 25 gjithsej, plus 10 për çdo pishpirik (15 me fant)	101, 120 a 151 pikë	totali më i madh

Deri ku luhet zgjidhet kur nis mbrëmja, sepse kjo është marrëveshje e tavolinës e jo rregull i lojës — dhe «Pa kufi» rri krah numrave, për mbrëmjen që mbaron kur ngrihet shoqëria. Ndërrohet edhe mes lojës, nga rreshti «Deri te …»: nëse dikush e ka kaluar tashmë numrin e ri, fleta mbyllet aty për aty, dhe rihapet po aq lehtë.

Te pishpiriku një dorë e plotë ndan 25 pikë: nga një për secilin as, dam, mbret, fant e dhjetë (22 me dhjetën e bastunit dy e dyshin e lules një), dhe tri për shumicën e letrave — 27 a më shumë, e askujt kur tavolina ndahet baras. Një pishpirik vlen 10, dhe 15 kur letra që e bën është fant. Ata numra rrinë shkruar nën fushat, që një dorë e numëruar gabim të bjerë në sy para se të ruhet.

Rregullat e magarecit

Një shkronjë për raund, dhe shtatë shkronja e mbarojnë mbrëmjen:

E humbi raundin	merr shkronjën e radhës nga „MAGAREC"
E mbushi fjalën	e humbi mbrëmjen; loja mbaron aty

Shkronjat nuk ruhen askund: raundi shkruhet si 1 për humbësin e 0 për të tjerët, dhe fjala del nga numri. Prandaj fshirja ose ndërrimi i një raundi të mesit i rinumëron vetvetiu të gjitha shkronjat pas tij.

Komandat

npm install
npm run dev       # serveri i zhvillimit
npm run build     # tsc --noEmit && vite build && vite build -c vite.punetori.config.ts
npm run preview
npm test          # node --test — 257 prova, pa framework provash

npm test para çdo commit-i.

Struktura

src/
  main.tsx            pikënisja
  App.tsx             shpërndarja e rrugëve
  rruga.ts            rrugëtimi me hash
  tipet.ts            tipet e të dhënave
  lojerat.ts          regjistri i katër lojërave: kush fiton, me çka mbaron
                      mbrëmja, a ka llogaritës, a shlyhet — pa DOM, pa bazë
  llogaritjet.ts      totalet, renditja, matrica, gjatësia e lojës dhe kush
                      përzien — pa DOM, pa bazë;
                      `permbledhja` i jep totalet, raundet e luajtura dhe
                      barazinë e pjesëmarrjes me një kalim të vetëm
  pikezimi.ts         rregullat hant/normal — pa DOM, pa bazë
  magareci.ts         shkronjat, fjala dhe magareci i mbrëmjes — pa DOM, pa bazë
  parashikimi.ts      vendi më i mirë e më i keq i arritshëm, raundet që duhen
                      për vendin e parë, dhe sa raunde i kanë mbetur mbrëmjes —
                      pa DOM, pa bazë
  ruajtja.ts          IndexedDB përmes `idb`
  kopja.ts            nxjerrja dhe leximi i kopjes rezervë
  bashkimi.ts         rregullat e sinkronizimit: kush fiton, çka dërgohet, çka
                      zbatohet — pa DOM, pa bazë, pa rrjetë
  skema.ts            migrimet SQL të projektit të përdoruesit — pa DOM
  projekti.ts         adresa, çelësi dhe mesazhet e gabimit — pa DOM, pa rrjetë
  identiteti.ts       `uid`-i i një regjistri dhe emri i një pajisjeje — pa DOM
  supabase.ts         klienti i vogël mbi `fetch`, dhe konfigurimi i ruajtur
  sinkronizimi.ts     shkarko, zbato, dërgo — dhe katër format e një lidhjeje
  pajisja.ts          emri e id-ja e këtij shfletuesi
  koha.ts             ora e hapjes, fundi i mbrëmjes dhe sa zgjati — pa DOM,
                      pa bazë
  fusha.ts            teksti i fushës së pikëve, shenja e tij dhe data
  mbledhja.ts         mbledhja e dorës: termat, fshirja prapa dhe shuma —
                      pa DOM, pa React
  versioni.ts         versioni i `package.json`-it, i futur gjatë ndërtimit
  qr.ts               kodues QR i shkruar me dorë (byte, niveli L, v1–20)
  paketa.ts           base64 i sigurt për adresa, dhe nënshkrimi
  kodi.ts             kodi tetëkarakterësh i bashkimit, dhe shkrimi i tij sa
                      shtypet — pa DOM, pa rrjetë
  ndarja.ts           rezultati i paketuar brenda një adrese
  sinjalizimi.ts      SDP-ja e ngjeshur brenda një adrese — pa DOM, pa WebRTC
  lidhja.ts           kanali WebRTC dhe rruga e sinjalit mes skedave
  lidhjaMeServer.ts   mënyra me kod, përmes një serveri të huaj
  takimi.ts           adresat e sinjalizimit tonë dhe kontrolli i tyre —
                      pa DOM, pa rrjetë
  lidhjaMeTakim.ts    mënyra me takim: i njëjti kanal, sinjalizimi ynë
  ngarko.ts           lexo-nga-baza si hook
  sherbimi.ts         çka ruhet për punë pa internet, dhe çka nuk preket —
                      pa DOM, pa `caches`
  analitika.ts        emri i rrugës që i shkon matjes, dhe pastrimi i adresës —
                      pa DOM, pa rrjetë
  matja.ts            numërimi i hapjeve te strehuesi: skripti dhe ndërrimi i
                      rrugës, asnjë vendim
  punetori.ts         punëtori i shërbimit: tri ngjarje, asnjë vendim
  instalimi.ts        regjistrimi, dhe njoftimi kur del një version i ri
  tema.ts             sistemi · dritë · terr — pa DOM, pa `localStorage`
  ndricimi.ts         tema e vënë te faqja, dhe e mbajtur mend
  ikonat.tsx          ikonat SVG inline
  style.css           sistemi i stilit
  pamjet/             Grupet · Grupi · Loja · Shiko · Lidhu · Pergjigja
                      Bashkohu · Sinkronizimi
  pjeset/             Renditja · Raundet · Shlyerja · TabelaEPergjithshme
                      FutjaERaundit · Mbledhesja · LojtaretELojes
                      FushaEKodit · PanelaEKopjes
                      RregullatELojes · Kohezgjatja
                      Ndarja · Drejtperdrejt · PaServer · MeServer
                      PamjaERezultatit · KodiQR
                      FutjaEMagarecit · RrjetiIMagarecit · RaundetEMagarecit
                      PergjithshmetEMagarecit · Parashikimi
                      PermbledhjaEPamjes · Vetja · Ndricimi · Gardhi

test/
  llogaritjet.test.mjs   totalet, renditja, matrica — kundër `logic.json`-it
  lojerat.test.mjs       regjistri: shkronjat e paketës, drejtimet, kufijtë
  fundi.test.mjs         kur mbaron mbrëmja e secilës lojë, dhe mbyllja me dorë
  fusha.test.mjs         futja e pikëve negative pa tastierë me minus, dhe
                         data ditë/muaj/vit sa shkruhet
  mbledhja.test.mjs      termat e mbledhur, «+» i shtypur dy herë dhe fshirja
                         prapa mbi një term të mbyllur
  pikezimi.test.mjs      rregullat — kundër raundeve të vërteta
  magareci.test.mjs      shkronjat, fjala e mbushur dhe tabela e grupit
  parashikimi.test.mjs   kufijtë e një raundi, dhe ligjet që vendi i mundshëm
                         nuk i thyen dot — mbi totalet e `logic.json`-it
  kopja.test.mjs         nxjerrja dhe refuzimi i skedarëve të dëmtuar
  qr.test.mjs            matrica të ngrira, të verifikuara me një dekodues
  ndarja.test.mjs        paketimi, dhe refuzimi i adresave të prera
  sinjalizimi.test.mjs   SDP-ja e ngjeshur — kundër SDP-ve të vërteta, dhe
                         refuzimi i rreshtave të futur brenda një adrese
  kodi.test.mjs          kodi i bashkimit, shkronjat që ngatërrohen, dhe çka
                         mbetet te fusha pas çdo prekjeje
  sherbimi.test.mjs      lista e asaj që ruhet, koshët e vjetër, dhe kërkesat
                         që punëtori nuk i prek fare
  tema.test.mjs          leximi i temës së ruajtur, dhe ngjyrat që rrinë të
                         shkruara te tre skedarë
  bashkimi.test.mjs      kush fiton një përplasje, çka shtyhet, çka refuzohet
  skema.test.mjs         migrimet: numrat, rregulli i sigurisë, dhe se
                         përsëritja e skriptit nuk prish gjë
  projekti.test.mjs      adresa, çelësi sekret që refuzohet, dhe përkthimi i
                         gabimeve
  identiteti.test.mjs    `uid`-et që nuk përsëriten, dhe emri i pajisjes
  logic.json             fleta origjinale, si burim provash
  sdp.json               SDP të vërteta të Chromium-it, si burim provash

Katër dëshmitarë rrinë jashtë npm test, sepse kërkojnë Playwright dhe një ndërtim të gatshëm:

deshmitare/
  supabase-i-rreme.mjs   një Supabase sa për të provuar shtresën e rrjetit
  rrjeti.mjs             hyrje → skript → verifikim → dërgim → pajisja e dytë
  lidhja-me-kod.mjs      lidhja me kod kundër një `peerjs-server` lokal, i cili
                         vritet në mes të mbrëmjes dhe kthehet
  takimi.mjs             shtrëngimi i plotë mes dy shfletuesve, dy skanime
                         njëkohësisht, dhe serveri që nuk preket më pas

Mënyra «Takim» e mban gjendjen e shtrëngimit te një Redis i vogël: te Vercel-i shtohet nga paneli (Storage → Upstash), dhe atëherë KV_REST_API_URL e KV_REST_API_TOKEN vijnë vetë. Pa të, serveri bie te kujtesa e çastit dhe lidhja del herë po e herë jo — ekrani e thotë me fjalë, dhe dy mënyrat e tjera punojnë si gjithmonë.

Arsyetimi pas zgjidhjeve rri te CLAUDE.md.

Stili

Paleta, kartelat dhe tabelat vijnë nga Kujdestaria — e njëjta paletë blu-nate me smerald e cian, dhe numrat tabelorë te kolonat. Dy gjëra ndryshojnë me qëllim:

• Fonti është Quicksand, e vendosur brenda paketës te public/shkronja/. Nuk merret nga Google Fonts gjatë hapjes: faqja duhet të hapet e plotë pa internet.
• Asnjë kalim ngjyre. Veprimi kryesor, çelësat e shtypur dhe shenja e faqes marrin ngjyrë të plotë; sfondi rri i sheshtë.

Kontrasti mbetet WCAG AA në dritë e në terr: teksti mbi veprimin kryesor del 5.5:1 dhe 7.6:1, dhe kufijtë e kontrolleve mbi 3:1 sipas WCAG 1.4.11.

Tableta e mbajtur anash i merr dy shtylla. Te telefoni gjithçka rri një kolonë e vetme dhe lexohet nga lart poshtë. Sapo ekrani ka gjerësi, ajo për të cilën hapet faqja rri majtas — grupet, historiku, futja e raundit, renditja — dhe çka preket a lexohet një herë kalon djathtas: kopja rezervë, sinkronizimi, përgjithshmet, rregullat, lojtarët, parashikimi, shlyerja. Te ekrani i lojës futja ngjitet me rrëshqitjen, pra raundi shënohet me renditjen para syve; te fleta që shikon dikush tjetër, e tëra hyn në një ekran pa rrëshqitur. Ekranet me një pyetje të vetme — kodi, pritja e lidhjes — qendërzohen në vend që të rrinë ngjitur te qoshja. Radha e leximit mbetet e njëjta te çdo gjerësi.

Ndriçimin e zgjedh tavolina, nga çelësi te fundfaqja e ekranit të parë: «Sistemi», «Dritë», «Terr». Hapet te drita; tema e errët rri e plotë një prekje larg, dhe «Sistemi» e kthen ndërrimin automatik të telefonit. Zgjedhja mbahet mend te vetë shfletuesi, jo te baza: nuk është e dhënë loje, nuk hyn te kopja rezervë dhe nuk del nga pajisja.